ಈ ಲೇಖನ ವಿಶ್ವವಾಣಿ ದಿನಪತ್ರಿಕೆಯ ‘ಕ್ಷ ಕಿರಣ’ ಅಂಕಣದಲ್ಲಿ 2026ರ ಸೆಪ್ಟೆಂಬರ್ 6ರಂದು ಪ್ರಕಟವಾಗಿದೆ. Read this article in English
ಹಿಂದೆಲ್ಲಾ ಜನ ಕೈಗಡಿಯಾರ ಕಟ್ಟಿಕೊಳ್ಳುತ್ತಿದ್ದುದು ಕೇವಲ ಸಮಯ ನೋಡಲಿಕ್ಕೆ. ಆದರೀಗ ಕಾಲ ಬದಲಾಗಿದೆ. ಈಗ ಜನ ಗಡಿಯಾರ ನೋಡೋದು ಟೈಮ್ ಎಷ್ಟಾಯ್ತು ಅಂತ ತಿಳಿಯೋದಕ್ಕಷ್ಟೇ ಅಲ್ಲ, ತಮ್ಮ ಹಾರ್ಟ್ ಬೀಟ್ ಎಷ್ಟಿದೆ, ದಿನಕ್ಕೆ ಎಷ್ಟು ಹೆಜ್ಜೆ ನಡೆದಿದ್ದೇವೆ, ರಾತ್ರಿ ಎಷ್ಟು ಹೊತ್ತು ನಿದ್ದೆ ಮಾಡಿದ್ದೇವೆ ಅಂತ ಚೆಕ್ ಮಾಡೋದಕ್ಕೆ! ಒಂದು ರೀತಿಯಲ್ಲಿ ನಮ್ಮ ಇಡೀ ದೇಹದ ಆಗುಹೋಗುಗಳನ್ನು ಮುಂಗೈಯಲ್ಲಿರುವ ಪುಟ್ಟ ಸ್ಕ್ರೀನ್ ಮೇಲೆ ತಂದುಕೊಟ್ಟ ಕೀರ್ತಿ ಈ ‘ಸ್ಮಾರ್ಟ್ ವಾಚ್’ ಅಥವಾ ‘ಹೆಲ್ತ್ ಟ್ರ್ಯಾಕರ್’ಗಳಿಗೆ ಸಲ್ಲಬೇಕು.
ಆರೋಗ್ಯದ ಅರಿವು: ಒಂದು ಅದ್ಭುತ ಹೆಜ್ಜೆ
ವೈದ್ಯನಾಗಿ ಹೇಳುವುದಾದರೆ, ಇದು ನಿಜಕ್ಕೂ ಸ್ವಾಗತಾರ್ಹ ಬೆಳವಣಿಗೆ. ಆರೋಗ್ಯದ ಬಗ್ಗೆ ಜನಸಾಮಾನ್ಯರಲ್ಲಿ ಕಾಳಜಿ ಮೂಡಲು ಈ ಗ್ಯಾಜೆಟ್‌ಗಳು ಬಹಳ ಸಹಾಯ ಮಾಡುತ್ತಿವೆ. ಸಂಜೆ ಆಫೀಸಿನಿಂದ ಬಂದಾಗ “ಇನ್ನೂ 2000 ಹೆಜ್ಜೆ ನಡೆದರೆ ಇಂದಿನ ಗುರಿ ಮುಟ್ಟಬಹುದು” ಎಂದು ಆ ವಾಚ್ ನೆನಪಿಸಿದಾಗ, ಸೋಮಾರಿತನ ಬಿಟ್ಟು ವಾಕಿಂಗ್ ಹೋಗುವವರಿದ್ದಾರೆ.
ಹಾಗೆಯೇ, ವಿಶ್ರಾಂತ ಸ್ಥಿತಿಯಲ್ಲಿ ಹೃದಯದ ಬಡಿತ ಎಷ್ಟಿರಬೇಕು, ರಕ್ತದಲ್ಲಿ ಆಕ್ಸಿಜನ್ ಪ್ರಮಾಣ ಎಷ್ಟಿರಬೇಕು ಎಂಬೆಲ್ಲಾ ವೈಜ್ಞಾನಿಕ ವಿಚಾರಗಳು ಈಗ ಎಲ್ಲರಿಗೂ ಅರ್ಥವಾಗುತ್ತಿವೆ. ಉತ್ತಮ ಆರೋಗ್ಯದತ್ತ ಹೆಜ್ಜೆ ಹಾಕಲು ಇವು ಅದ್ಭುತ ಸಾಧನಗಳು.
ಡೇಟಾ ತರುವ “ಆತಂಕ”ದ ಡಾರ್ಕ್ ಸೈಡ್!
ಆದರೆ, ಬೆಂಕಿಯನ್ನು ಅಡುಗೆ ಮಾಡಲೂ ಬಳಸಬಹುದು, ಕೈ ಸುಟ್ಟುಕೊಳ್ಳಲೂ ಬಳಸಬಹುದು ಅಲ್ಲವೇ? ಈ ಸ್ಮಾರ್ಟ್ ತಂತ್ರಜ್ಞಾನವೂ ಹಾಗೆಯೇ. ಇದರ ಅತಿ-ಬಳಕೆಯು “ಹೆಲ್ತ್ ಆಂಗ್ಸೈಟಿ” ಅಥವಾ ಆರೋಗ್ಯದ ಕುರಿತು ಅನಗತ್ಯವಾಗಿ ಆತಂಕವನ್ನು ಸೃಷ್ಟಿಸುತ್ತಿದೆ.
ನಿತ್ಯ ಆಸ್ಪತ್ರೆಗೆ ಬರುವ ಅನೇಕರು ಈಗ ತಮ್ಮ ಸ್ಮಾರ್ಟ್ ವಾಚ್ ಅಥವಾ ಫೋನಿನ ರಿಪೋರ್ಟ್ ತೋರಿಸುತ್ತಾರೆ… “ಡಾಕ್ಟ್ರೇ, ನಿನ್ನೆ ರಾತ್ರಿ ನನಗೆ ಬರೀ 40 ನಿಮಿಷ ಡೀಪ್ ಸ್ಲೀಪ್ ಬಂದಿದೆ ಅಂತೆ. ಬೆಳಗ್ಗೆ ಎದ್ದಾಗ ಹಾರ್ಟ್ ಬೀಟ್ 98 ಇತ್ತು, ನನಗೆ ಏನೋ ತೊಂದರೆ ಆಗೋ ಲಕ್ಷಣನಾ?” ಎಂದು ಗಾಬರಿಯಿಂದ ಕೇಳುವವರ ಸಂಖ್ಯೆ ಹೆಚ್ಚಾಗುತ್ತಿದೆ.
ನಿದ್ರೆಯ ವಿಶ್ಲೇಷಣೆ: ನೈಜತೆಯೇನು?
ನಿದ್ರೆಯನ್ನೇ ಉದಾಹರಣೆಯಾಗಿ ತೆಗೆದುಕೊಳ್ಳೋಣ. ವಾಸ್ತವದಲ್ಲಿ, ಗಾಢ ನಿದ್ರೆ ಮತ್ತು ಕನಸಿನ ನಿದ್ರೆ ಮುಂತಾದ ನಿದ್ರೆಯ ಹಂತಗಳನ್ನು ನಿಖರವಾಗಿ ಅಳೆಯಲು ಮಿದುಳಿನ ತರಂಗಗಳನ್ನು (ಹೃದಯಕ್ಕೆ ಇಸಿಜಿ ಮಾಡಿದ ಹಾಗೆ, ಮಿದುಳಿಗೆ ಇಇಜಿ) ಅಳೆಯಬೇಕಾಗುತ್ತದೆ. ನಿಮ್ಮ ಕೈಯಲ್ಲಿರುವ ವಾಚ್ ಕೇವಲ ನಿಮ್ಮ ನಾಡಿಬಡಿತ ಮತ್ತು ಕೈಯ ಚಲನೆಯನ್ನು ಆಧರಿಸಿ ನಿದ್ರೆಯ ಗುಣಮಟ್ಟವನ್ನು ಊಹಿಸುತ್ತದೆ ಅಷ್ಟೇ. ಅದೇನೂ ಬಹಳ ನಿಖರವಲ್ಲ.
ನೀವು ಬೆಳಗ್ಗೆ ಎದ್ದಾಗ ನಿಮಗೆ ಉಲ್ಲಾಸವೆನಿಸಿದರೆ, ನೀವು ಚೆನ್ನಾಗಿ ನಿದ್ರೆ ಮಾಡಿದ್ದೀರಿ ಎಂದೇ ಅರ್ಥ. ಆದರೆ, ಕೆಲವರು ತಾವು ಫ್ರೆಶ್ ಆಗಿದ್ದರೂ, ವಾಚ್‌ನಲ್ಲಿ “ಸ್ಲೀಪ್ ಸ್ಕೋರ್ ಕಡಿಮೆ ಇದೆ” ಎಂದು ನೋಡಿದ ತಕ್ಷಣವೇ ಸುಸ್ತು, ತಲೆನೋವು ಶುರುವಾದಂತೆ ವರ್ತಿಸುತ್ತಾರೆ! ಇಲ್ಲದ ಕಾಯಿಲೆಯನ್ನು ಡೇಟಾ ನೋಡಿ ಮನಸ್ಸಿನಲ್ಲೇ ಸೃಷ್ಟಿಸಿಕೊಳ್ಳುವ ಈ ವಿಪರ್ಯಾಸವನ್ನು ವೈದ್ಯಕೀಯ ಭಾಷೆಯಲ್ಲಿ ‘ನೊಸೆಬೊ ಎಫೆಕ್ಟ್’ (Nocebo Effect) ಎನ್ನುತ್ತೇವೆ.
ದಿನದ ಏರಿಳಿತ ಬೇಡ, ದೀರ್ಘಕಾಲದ ಟ್ರೆಂಡ್ ನೋಡಿ
ಹಾಗಾದರೆ ಈ ಗ್ಯಾಜೆಟ್‌ಗಳನ್ನು ಹೇಗೆ ಬಳಸಬೇಕು? ಇಲ್ಲೊಂದು ಸರಳ ನಿಯಮವಿದೆ: “ದಿನನಿತ್ಯದ ಸಣ್ಣಪುಟ್ಟ ಬದಲಾವಣೆಗಳನ್ನು ನಿರ್ಲಕ್ಷಿಸಿ, ದೀರ್ಘಕಾಲದ ಟ್ರೆಂಡ್ ಮಾತ್ರ ಗಮನಿಸಿ.”
ಇದಕ್ಕೊಂದು ಸಿಂಪಲ್ ಉದಾಹರಣೆ ಕೊಡುತ್ತೇನೆ. ನೀವು ವಾಹನ ಚಲಾಯಿಸುತ್ತಿರುವಾಗ ನಿಮ್ಮ ದೃಷ್ಟಿ ಮುಂದಿರುವ ರಸ್ತೆಯ ಮೇಲಿರಬೇಕೇ ಹೊರತು, ಕಾರಿನ ಡ್ಯಾಶ್‌ಬೋರ್ಡ್ ಮೇಲಿರುವ ಮೀಟರ್‌ಗಳ ಮೇಲಲ್ಲ! ಆಗಾಗ ಡ್ಯಾಶ್‌ಬೋರ್ಡ್ ನೋಡುವುದು ಸುರಕ್ಷತೆಗೆ ಒಳ್ಳೆಯದು, ಆದರೆ ಕೇವಲ ಮೀಟರ್ ನೋಡಿಕೊಂಡೇ ಗಾಡಿ ಓಡಿಸಿದರೆ ಅಪಘಾತ ಖಚಿತ.
ನಮ್ಮ ದೇಹವೂ ಒಂದು ಜೀವಂತ ವ್ಯವಸ್ಥೆ. ನಿನ್ನೆ ರಾತ್ರಿ ಸ್ವಲ್ಪ ಖಾರ ತಿಂದರೆ, ಒಂದು ಕೆಟ್ಟ ಕನಸು ಬಿದ್ದರೆ ಅಥವಾ ಆಫೀಸಿನ ಟೆನ್ಷನ್ ಇದ್ದರೆ ಮರುದಿನ ಬೆಳಗ್ಗೆ ವಿಶ್ರಾಂತ ಹೃದಯದ ಬಡಿತ ಸ್ವಲ್ಪ ಹೆಚ್ಚಾಗಬಹುದು. ಇದು ನಮ್ಮ ದೇಹ ನೀಡುವ ಸಹಜ ಪ್ರತಿಕ್ರಿಯೆಯೇ ಹೊರತು, ಕಾಯಿಲೆಯಲ್ಲ. ಒಂದು ದಿನ ನಿದ್ದೆ ಕಡಿಮೆಯಾಯ್ತು, ಒಂದು ದಿನ ಹಾರ್ಟ್ ಬೀಟ್ ಸ್ವಲ್ಪ ಏರುಪೇರಾಯ್ತು ಎಂದು ಆತಂಕಪಡುವ ಅಗತ್ಯವಿಲ್ಲ.
ಆದರೆ, ಸತತವಾಗಿ ಒಂದು ತಿಂಗಳಿನಿಂದ ನಿಮ್ಮ ವಿಶ್ರಾಂತ ಹೃದಯದ ಬಡಿತ ಏರುತ್ತಲೇ ಇದ್ದರೆ ಅಥವಾ ನಿಮ್ಮ ದೈನಂದಿನ ನಿದ್ರೆಯ ಗುಣಮಟ್ಟ ಸತತವಾಗಿ ಕುಸಿಯುತ್ತಿದ್ದರೆ, ಆಗ ಅದು ಕೇವಲ ಏರಿಳಿತವಲ್ಲ, ಅದೊಂದು “ಟ್ರೆಂಡ್”. ಇಂತಹ ಸಂದರ್ಭದಲ್ಲಿ ವೈದ್ಯರನ್ನು ಭೇಟಿಯಾಗಿ ಸಲಹೆ ಪಡೆಯುವುದು ಜಾಣತನ.
ಕೊನೆಯ ಮಾತು
ಸ್ಮಾರ್ಟ್ ವಾಚ್‌ಗಳು ನಮಗೆ ದಿಕ್ಸೂಚಿಯಿದ್ದಂತೆ. ಅವು ನಮಗೆ ಆರೋಗ್ಯದ ದಾರಿ ತೋರಿಸಬಲ್ಲವೇ ಹೊರತು, ನಮ್ಮ ಜೀವನವನ್ನು ನಿಯಂತ್ರಿಸುವ ರಿಮೋಟ್ ಕಂಟ್ರೋಲ್ ಆಗಬಾರದು. ಟ್ರ್ಯಾಕರ್‌ನ ಡೇಟಾವನ್ನು ಮಾಹಿತಿಯಾಗಿ ತೆಗೆದುಕೊಳ್ಳಿ, ಮೆಡಿಕಲ್ ರಿಪೋರ್ಟ್ ಆಗಿಯಲ್ಲ.
ಆರೋಗ್ಯದ ಬಗ್ಗೆ ಕಾಳಜಿ ಇರಲಿ, ಆದರೆ ಅದು ಆತಂಕವಾಗಿ ಬದಲಾಗದಿರಲಿ. ಸ್ಮಾರ್ಟ್ ವಾಚ್ ನಿಮ್ಮ ಸೋಮಾರಿತನವನ್ನು ಓಡಿಸಬೇಕೇ ಹೊರತು, ನಿಮ್ಮ ನಿದ್ದೆಯನ್ನಲ್ಲ!
