ಗಾಬರಿ ಬೇಡ, ಎಚ್ಚರಿಕೆ ಇರಲಿ: ಆರೋಗ್ಯ ತಪಾಸಣೆಯ ಹಿಂದಿನ ಆತಂಕ ಮತ್ತು ವಾಸ್ತವ

ಈ ಲೇಖನ ಉದಯವಾಣಿ ದಿನಪತ್ರಿಕೆಯ ‘ಆರೋಗ್ಯವಾಣಿ’ ಪುರವಣಿಯಲ್ಲಿ ಪ್ರಕಟವಾಗಿದೆ. Read this article in English

ಆಸ್ಪತ್ರೆಯ ನಿಶ್ಯಬ್ದ ತಪಾಸಣಾ ಕೊಠಡಿಯೊಳಗೆ ಆ ನಡು ವಯಸ್ಸಿನ ವ್ಯಕ್ತಿ ಕಾಲಿಟ್ಟಾಗ, ಅವರ ನಡಿಗೆಯಲ್ಲಿ ಕೊಂಚ ಹಿಂದೇಟು ಹಾಗೂ ಮುಖದಲ್ಲಿ ಬಹಳಷ್ಟು ಅನುಮಾನಗಳಿದ್ದವು. ಕುರ್ಚಿಯ ತುದಿಯಲ್ಲಿ ಕುಳಿತು, ತಮ್ಮ ಆತಂಕವನ್ನು ಮುಚ್ಚಿಡಲು ಯತ್ನಿಸುತ್ತಾ ಅವರು ಕೇಳಿದರು, “ಡಾಕ್ಟರ್, ಇತ್ತೀಚೆಗೆ ಎಲ್ಲರೂ ನಿಯಮಿತ ಆರೋಗ್ಯ ತಪಾಸಣೆ (regular health check-ups) ಮಾಡಿಸಬೇಕು ಎನ್ನುತ್ತಾರೆ. ಆದರೆ ನನಗೆ ಯಾವ ತೊಂದರೆಯೂ ಇಲ್ಲ, ಸಂಪೂರ್ಣ ಆರೋಗ್ಯವಾಗಿದ್ದೇನೆ ಎನಿಸುತ್ತಿದೆ; ಹಾಗಿದ್ದ ಮೇಲೆ ಸುಮ್ಮನೆ ತಪಾಸಣೆ ಏಕೆ ಮಾಡಿಸಬೇಕು?”

ಇದು ಬಹಳ ಸಹಜವಾದ ಪ್ರಶ್ನೆ, ಅನೇಕರು ಹೀಗೆಯೇ ಯೋಚಿಸುತ್ತಾರೆ. ನಾವು ಮೇಲ್ನೋಟಕ್ಕೆ ಆರೋಗ್ಯವಾಗಿದ್ದೇವೆ ಎಂದುಕೊಳ್ಳುವುದು ಮುಖ್ಯವೇ, ಆದರೆ ವಾಸ್ತವ ಬೇರೆಯೇ ಇರುತ್ತದೆ. ಡಯಾಬಿಟಿಸ್, ಹೈ ಬಿಪಿ (high blood pressure) ಅಥವಾ ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಗಳು ಶುರುವಾಗುವಾಗ ಯಾವುದೇ ಮುನ್ಸೂಚನೆ ಅಥವಾ ಲಕ್ಷಣಗಳನ್ನು ತೋರಿಸುವುದಿಲ್ಲ. ಲಕ್ಷಣಗಳು ಕಾಣಿಸಿಕೊಳ್ಳುವ ಹೊತ್ತಿಗೆ, ಅವು ದೇಹದ ಅಂಗಾಂಗಗಳಿಗೆ ಸಾಕಷ್ಟು ಹಾನಿ ಮಾಡಿರಬಹುದು ಅಥವಾ ಬೇರೆ ಅಂಗಗಳಿಗೂ ಹರಡಿರಬಹುದು.

“ಅದೇ ನನ್ನ ಪ್ರಶ್ನೆ ಡಾಕ್ಟರ್, ಏನಾದರೂ ಆಗುವುದಿದ್ದರೆ ಹಾಗೆ ಆಗಿಯೇ ಆಗುತ್ತದಲ್ಲವೇ? ಲಕ್ಷಣಗಳೇ ಇಲ್ಲದಿರುವಾಗ ಸುಮ್ಮನೆ ಪರೀಕ್ಷೆ ಏಕೆ?” ಎಂದು ಅವರು ಮರುಪ್ರಶ್ನಿಸಿದರು.

ನಮ್ಮ ವಾಹನದ ಇಂಜಿನ್ ಕೆಟ್ಟು ನಿಂತು ಶಬ್ದ ಮಾಡುವವರೆಗೆ ನಾವು ಕಾಯುವುದಿಲ್ಲ, ಎಲ್ಲವೂ ಸರಿಯಿದ್ದಾಗಲೇ ಸರ್ವಿಸ್ ಮಾಡಿಸುತ್ತೇವೆ ಅಲ್ಲವೇ? ನಮ್ಮ ದೇಹಕ್ಕೂ ಇಂಥದ್ದೇ ನಿಯಮಿತ ತಪಾಸಣೆಯ ಅಗತ್ಯವಿದೆ. ಆರ್ಥಿಕ ಮುಗ್ಗಟ್ಟು ಬಂದಾಗಲಷ್ಟೇ ನಾವು ಹಣದ ಬಗ್ಗೆ ಯೋಚಿಸುವುದಿಲ್ಲ; ಮುಂದೆ ಕಷ್ಟ ಬರಬಾರದು ಎಂದೇ ಮೊದಲೇ ಹೂಡಿಕೆ, ವಿಮೆ ಮತ್ತು ಟ್ಯಾಕ್ಸ್ ರಿಟರ್ನ್ಸ್ ಮಾಡುತ್ತೇವೆ.

ಆರೋಗ್ಯ ತಪಾಸಣೆ ಕೂಡ ಆರ್ಥಿಕ ಲೆಕ್ಕಪರಿಶೋಧನೆಯಿದ್ದಂತೆ; ಭವಿಷ್ಯದಲ್ಲಿ ‘ಆರೋಗ್ಯದ ದಿವಾಳಿತನ’ (health bankruptcy) ಎದುರಾಗದಂತೆ ಇದು ನಮ್ಮನ್ನು ಕಾಪಾಡುತ್ತದೆ. ಶುಗರ್ ಏರಿಕೆ ಇರುವುದನ್ನು ಬೇಗನೆ ಪತ್ತೆ ಮಾಡಿದರೆ ಮುಂದೆ ಕಿಡ್ನಿ ಹಾಳಾಗುವುದನ್ನು ತಡೆಯಬಹುದು. ಸಣ್ಣದೊಂದು ಸ್ಕ್ಯಾನ್, ಕ್ಯಾನ್ಸರ್ ಗಡ್ಡೆಯಾಗಿ ಬೆಳೆಯುವ ಮುನ್ನವೇ ಅಪಾಯವನ್ನು ತೋರಿಸಬಲ್ಲದು.

“ಹಾಗಾದರೆ ಈ ತಪಾಸಣೆಯಲ್ಲಿ ಬರೀ ರಕ್ತಪರೀಕ್ಷೆ ಮಾತ್ರ ಇರುತ್ತದೆಯೇ?” ಎನ್ನುವ ಕುತೂಹಲ ಅವರದು.

ನಿಯಮಿತ ತಪಾಸಣೆ ಎನ್ನುವುದು ಕೇವಲ ರಕ್ತಪರೀಕ್ಷೆ ಅಲ್ಲ.

“ಕಳೆದ ಬಾರಿ ನನ್ನ ತಾಯಿಯನ್ನು ಕರೆತಂದಾಗ ನೀವು ವಯಸ್ಕರ ಲಸಿಕೆಗಳ ಬಗ್ಗೆ ಹೇಳಿದ್ದಿರಿ. ಲಸಿಕೆ ಕೇವಲ ಮಕ್ಕಳಿಗೆ ಮಾತ್ರ ಅಂದುಕೊಂಡಿದ್ದೆ” ಎಂದರು.

“ಹಾಗಾದರೆ ಎಷ್ಟು ವರ್ಷಗಳಿಗೊಮ್ಮೆ ಈ ತಪಾಸಣೆ ಮಾಡಿಸಬೇಕು?” ಎಂದು ಕೇಳಿದರು.

ತಮ್ಮ ಕೈಬೆರಳುಗಳನ್ನು ಹಿಸುಕಿಕೊಳ್ಳುತ್ತಾ ಅವರು ನುಡಿದರು, “ನಿಜ ಹೇಳಬೇಕೆಂದರೆ, ಡಾಕ್ಟರ್, ನನಗೇನೋ ಭಯ. ವರದಿಯಲ್ಲಿ ಏನಾದರೂ ಕೆಟ್ಟದ್ದು ಬಂದರೆ ಎದುರಿಸಲು ಸಿದ್ಧನಿದ್ದೇನೆಯೋ ಇಲ್ಲವೋ ತಿಳಿಯದು.”

ಈ ಭಯ ಬಹಳ ಸಹಜ; ಇದೇ ಕಾರಣಕ್ಕೆ ಬಹಳಷ್ಟು ಜನರು ತಪಾಸಣೆಯಿಂದ ದೂರ ಉಳಿಯುತ್ತಾರೆ. ಆದರೆ, ಕಾಯಿಲೆಯನ್ನು ಬೇಗ ಪತ್ತೆ ಹಚ್ಚುವುದು ಒಂದು ಆಶೀರ್ವಾದವೇ ಸರಿ, ಏಕೆಂದರೆ ಈಗ ಕಾಣುವ ಸಣ್ಣ ಸಮಸ್ಯೆಯನ್ನು ಸುಲಭವಾಗಿ ಗುಣಪಡಿಸಬಹುದು.

“ವರದಿಗಳೆಲ್ಲಾ ನಾರ್ಮಲ್ ಬಂದರೆ, ಮುಂದಿನ ಐದು ವರ್ಷಗಳ ಕಾಲ ನಾನು ಸಂಪೂರ್ಣ ಸುರಕ್ಷಿತ ಎಂದುಕೊಳ್ಳಬಹುದೇ?”

ಆರೋಗ್ಯ ತಪಾಸಣೆ ಎನ್ನುವುದು ಯಾವುದೇ ವಾರಂಟಿ ಕಾರ್ಡ್ ನೀಡುವುದಿಲ್ಲ. ಅದು ನಿಮ್ಮ ಪ್ರಸ್ತುತ ಆರೋಗ್ಯದ ಸ್ಥಿತಿಯನ್ನು (snapshot) ಮಾತ್ರ ಹೇಳುತ್ತದೆ. ಒತ್ತಡ, ಆಹಾರ, ವಯಸ್ಸು ಹಾಗೂ ಪರಿಸರ ನಮ್ಮ ಮೇಲೆ ನಿರಂತರವಾಗಿ ಪರಿಣಾಮ ಬೀರುತ್ತಿರುವುದರಿಂದ, ಆರ್ಥಿಕ ಯೋಜನೆ ಅಥವಾ ವಾಹನದ ನಿರ್ವಹಣೆಯಂತೆ ಆರೋಗ್ಯವನ್ನು ‘ಅಪ್‌ಡೇಟ್’ ಮಾಡಿಕೊಳ್ಳುತ್ತಿರಬೇಕು.

“ಆದರೆ ಮಿತಿಮೀರಿದ ಪರೀಕ್ಷೆಗಳಿಂದ (overtesting) ಗೊಂದಲ ಹೆಚ್ಚಾಗುತ್ತದೆ ಎಂದು ಕೇಳಿದ್ದೇನೆ. ಜೊತೆಗೆ, ನನಗಂತೂ ಇಡೀ ದಿನ ರಜೆ ಹಾಕಲು ಸಮಯವೇ ಇಲ್ಲ” ಎಂದರು.

ಹೌದು, ಕಾರಣವಿಲ್ಲದೆ ಎಲ್ಲ ಪರೀಕ್ಷೆಗಳನ್ನು ಮಾಡಿಸಿದರೆ ಅನಗತ್ಯ ಗೊಂದಲ, ಸುಖಾಸುಮ್ಮನೆ ಚಿಕಿತ್ಸೆ ಪಡೆಯುವ (overdiagnosis) ಪರಿಸ್ಥಿತಿ ಬರಬಹುದು. ಪ್ರತಿಯೊಬ್ಬರಿಗೂ ಎಲ್ಲ ಪರೀಕ್ಷೆಗಳ ಅಗತ್ಯವಿರುವುದಿಲ್ಲ.

ಇನ್ನು ಸಮಯದ ಬಗ್ಗೆ ಹೇಳುವುದಾದರೆ, ಮುಂಚಿತವಾಗಿ ಅಪಾಯಿಂಟ್‌ಮೆಂಟ್ ಪಡೆದುಕೊಂಡರೆ ಕೇವಲ ೩ ರಿಂದ ೫ ಗಂಟೆಗಳಲ್ಲಿ ತಪಾಸಣೆ ಮುಗಿಯುತ್ತದೆ. ಭವಿಷ್ಯದ ದೃಷ್ಟಿಯಿಂದ ಒಂದು ದಿನದ ರಜೆ ಹಾಕಿದರೂ ಅದು ಅತ್ಯುತ್ತಮ ಹೂಡಿಕೆಯೇ ಸರಿ.

“ಕೆಲವರು ಇದನ್ನೆಲ್ಲಾ ಆಸ್ಪತ್ರೆಗಳ ಹಣ ಮಾಡುವ ತಂತ್ರ ಎನ್ನುತ್ತಾರೆ. ಮತ್ತೆ ಕೆಲವರು, ‘ದೇವರ ಮೇಲೆ ಭಾರ ಹಾಕು, ಆಗುವುದು ಆಗಿಯೇ ತೀರುತ್ತದೆ’ ಎನ್ನುತ್ತಾರೆ. ಅದೂ ನಿಜವಲ್ಲವೇ?” ಎಂದು ಅವರು ಕೊನೆಯ ಅಸ್ತ್ರ ಬಿಟ್ಟರು.

ವೈದ್ಯಕೀಯ ಕ್ಷೇತ್ರದಲ್ಲಿ ವ್ಯವಹಾರಿಕ ಪ್ರಭಾವ ಇರುವುದು ನಿಜ, ಹಾಗಾಗಿ ನಂಬಿಕಸ್ಥ ವೈದ್ಯರು ಮತ್ತು ಆಸ್ಪತ್ರೆಯನ್ನು ಆರಿಸಿಕೊಳ್ಳುವುದು ನಿಮ್ಮ ಜವಾಬ್ದಾರಿ.

ದೇವರ ಮೇಲಿನ ನಂಬಿಕೆ ಕಷ್ಟದ ಸಮಯದಲ್ಲಿ ನೆಮ್ಮದಿ ಕೊಡುತ್ತದೆ, ಪ್ರಸಾದ ಬುದ್ಧಿಯಿಂದ ಎಲ್ಲವನ್ನೂ ಸ್ವೀಕರಿಸುವುದು ಒಳ್ಳೆಯದೇ. ಆದರೆ ನಂಬಿಕೆ ಮತ್ತು ಕರ್ಮ ಪರಸ್ಪರ ವಿರುದ್ಧವಲ್ಲ. ಭಗವದ್ಗೀತೆಯ ೨ನೇ ಅಧ್ಯಾಯದ ೪೭ನೇ ಶ್ಲೋಕ ‘ಕರ್ಮಣ್ಯೇವಾಧಿಕಾರಸ್ತೇ…’ ಹೇಳುವಂತೆ, ನಮಗೆ ಕರ್ಮ ಮಾಡುವ ಅಧಿಕಾರವಿದೆ, ಫಲದ ಮೇಲಲ್ಲ. ಕರ್ಮ ಮಾಡದಿರುವುದು ಕೂಡ ಒಂದು ರೀತಿಯ ಅಕರ್ಮವೇ; ‘ಮಾ ತೇ ಸಂಗೋಸ್ತ್ವಕರ್ಮಣಿ’ ಎಂದು ಗೀತೆ ಎಚ್ಚರಿಸುತ್ತದೆ.

ನಮ್ಮ ದೇಹವನ್ನು ಕಾಪಾಡಿಕೊಳ್ಳುವುದು, ನಿಯಮಿತ ತಪಾಸಣೆ ಮಾಡಿಸುವುದು, ಎಚ್ಚರಿಕೆಯಿಂದ ಆಹಾರ ಸೇವಿಸುವುದು, ವ್ಯಾಯಾಮ ಮಾಡುವುದು – ಇವೆಲ್ಲವೂ ದೇಹದ ಬಗ್ಗೆ ನಮಗಿರುವ ಕರ್ತವ್ಯಗಳು. ಕಳ್ಳ ಬರುತ್ತಾನೆಂದಲ್ಲ, ಆದರೆ ಅಪಾಯವನ್ನು ತಪ್ಪಿಸಲು ನಾವು ರಾತ್ರಿ ಬಾಗಿಲು ಹಾಕುವಂತೆ, ಆರೋಗ್ಯ ತಪಾಸಣೆ ಎನ್ನುವುದು ಭಯವಲ್ಲ, ಅದು ಮುಂದಾಲೋಚನೆ. ನಮ್ಮ ಕೈಯಲ್ಲಿರುವುದನ್ನು ನಾವು ಮಾಡೋಣ, ಉಳಿದದ್ದನ್ನು ದೇವರಿಗೆ ಬಿಡೋಣ.

“ಬಹಳ ಚೆನ್ನಾಗಿ ಹೇಳಿದಿರಿ ಡಾಕ್ಟರ್, ನಾನೆಂದೂ ಈ ದೃಷ್ಟಿಕೋನದಲ್ಲಿ ಯೋಚಿಸಿಯೇ ಇರಲಿಲ್ಲ” ಎಂದು ಅವರು ನಿರಾಳರಾದರು. ಆರೋಗ್ಯವೆನ್ನುವುದು ಒಂದು ಪಯಣ; ತಪಾಸಣೆ ಆ ಪಯಣದ ಒಂದು ಸರಿಯಾದ ಹೆಜ್ಜೆ ಮಾತ್ರ.